التخطي إلى المحتوى
اعرف ماذا يحدث عندما تموت
اعرف ماذا يحدث عندما تموت

هيحصل ايه لما نموت ؟! ؟!

كلنا هنتعامل مع الموت دلوقتي او بعدين، موتنا احنا او موت حد تاني، تعالوا نعرف بقي بالتفصيل ايه اللي بيحصل لما نموت
في غضون ثواني:

اخر كمية من الاكسجين في الجسم هتستنفذ فنشاط المخ هيقل جدا وهتتوقف الخلايا العصبية عن افراز النواقل والهرمونات اللي بتتحكم في شتي وظايف الجسم، بعض الوظايف هتستمر لفترة صغيرة بسبب استمرار وجود بعض ال ATP اللي هوا مصدر الطاقة في الجسم وبيحصل ارتخاء في العضلات بما فيها عضلات المثانة والمستقيم فبيحصل اخراج للبول والفضلات.

في خلال من 15 ل 25 دقيقة:

توقف ضخ الدم في الشعيرات بيسبب شحوب الجلد للموتي، ولان القلب بيبطل توزيع الدم في الجسم وحفظ جريانه بانتظام في الاوردة والشرايين فالجاذبية بتسبب تراكم الدم في الجزء السفلي من الجسم.

في خلال ساعات قليلة:

هيحصل فقد تام للون البشرة الطبيعي بسبب عامل الجاذبية اللي قولنا عليه وبيتحول اللون لدرجة من البنفسجي، بتوصل العملية دى ذروتها في خلال 12 ساعة، ودي من الطرق اللي الاطباء الشرعيين بيعرفوا بيها معاد الوفاة و وضعية المتوفي ساعة الوفاة.

في خلال من 3 ل 6 ساعات:

بتحصل حالة التيبس الشهيرة، بتحصل بسبب ان الخلايا بتفقد الكالسيوم اللي بداخلها لصالح الخارج في الانسجة العضلية، وارتباط الكالسيوم ده ببروتينات السطح علي العضلات بيسبب انقباض تام للعضلات وهوا ده سبب التيبس اللي بيحصل لمدة 24 ل 48 ساعة قادمة.

لو الجسم متمش حفظه بالتبريد او الحفظ الكيماوي بتبدا الخلايا تموت وتتحلل، ومع غياب الاوكسجين وارتفاع نسبة ثاني اكسيد الكربون وزيادة تحلل الخلايا بيحصل ارتفاع درجة الحمضية داخل الجسم، الشئ اللي بيسرع عملية تحلل اغشية الخلايا وخروج الانزيمات الهاضمة من داخلها عشان تقوم هيا بدورها باكمال عملية التحلل.

فيه كمان ما يقرب من 100 تريليون خلية ميكروبية هتساعد في عملية التحلل، مثلا البكتريا المعوية هتحلل الامعاء، عملية التحلل البكتيري دي اسمها “التعفن” ، و واضح من الاسم ان دي لحظة خروج الروايح الكريهة بسبب اطلاق البكتريا غازات كريهة من تكسيرها للاحماض الامينية. وده بيجذب حشرات وديدان كتير للانسجة دي، وهتقوم بوضع بيضها فيه لغاية ما تخرج منها يرقات تتغذي بدورها علي باقي الجسم.

في غضون اسابيع:

اليرقات والديدان بتستهلك حوالي 60 % من الجسم مسببة فتحات تسمح للسوائل والغازات المتبقية انهم يخرجوا، استمرار العملية دي بيسبب ما يعرف بالبقايا الجافة، ده بياخد من 25 ل 60 يوم بس ممكن تحصل اسرع في الحر.

في غضون سنوات قليلة بقي النباتات والحيوانات هتتغذي علي كل ما تبقي حتي العظام، وفي النهاية خالص كل العناصر بترجع للطبيعة.

التعليقات

نحن هنا من اجلك لا تتردد في ترك رد لمساعدتك