التخطي إلى المحتوى
إستخدامات الميكرويف وفوائده وأضراره
إستخدامات الميكرويف وفوائده وأضراره

اليوم هعرض لكم نبذة مختصرة عن جهاز الميكرويف واستخدامه والاوانى المستخدمة فية وفوائدة واضرارة، في البداية انواع الميكرويف كتيرة جدا فى السوق بس الافضل الماركات الغير صينية، مثلا دة بتاعى اللى فى الصورة ماركة دايو كوري، وفيه فرق بين الميكرويف وفرن الكهرباء فالميكرويف حاجة وفرن الكهرباء حاجة تانية خالص

استخدامات وإستعمالات جهاز الميكرويف

  • يستعمل الميكرويف في طهي بعض الاطعمة.
  • التسخين.
  • وفي فك التجميد عن الاطعمة.
  • وفي بعض الانواع يوجد شواية للتحمير بس انا لا يوجد عندى شواية فمش هتكلم عليها لانى ما جربتش.
  • واستخدام اخر تعقيم ببرونات الاطفال وتعقيم البرطمانات الزجاج.
  • الطهي مثل الفشار او البيض العيون او سلق بعض الخضروات وغير ذلك ..
  • لكن انا عن نفسي لا افضل استخدامة في الطهى لتجنب الاضرار الناتجة عن زيادة الوقت فى الطهي.

إستخدام الميكرويف فى التسخين

  • تسخين الخبز (العيش) ممتاز فى تسخينة بس بشرط لا نترك العيش مدة طويلة اقصي شئ 30 ثانية لان بعد كدة ممكن ينشف جدا لان الميكرويف بيسحب السوايل من الاطعمة.
  • وكمان بنستخدمه فى تسيح الشيكولاتة الخام وبردوا نبدأ ب 30 ثانية ونطلعها نقلبها كويس ولو احتاجت تانى نزود بالتدريج لانها بعد كدة بتتحرق انتبهوا.
  • وكمان ممكن نسخن اى شئ اخر من الاطعمة مثل الرز المكرونة الخضار المطبوخ البيتزا وغيرة كتير من الاطعمة.

إستخدام الميكرويف فى تفكيك التجميد

اما طريقة إستخدام الميكرويف فى فك التجميد عن الاطعمة مثل اللحوم والدجاج والاسماك.

طبعا بيكون فية ازار كتير جدا مثلا اللي في الصورة فية مفتاح مخصوص لتسخين السوايل فى الكوب وعلى حسب عدد الاكواب بتضغطى المفتاح اللى علية رسمة الكوب يعنى لو هنحط كوب يبقي نضغط المفتاح مرة واحدة ولو 2 يبقي مرتين وهكذا.

وفية مفتاح للشوربة ومفتاح للسمك ومفتاح لفك التجميد ومخصص مفتاح للحوم واخر للاسماك واخر للدواجن.

وهناك مفاتيح لضبط درجات الحرارة ومفاتيح لزيادة الدرجة او تقليلها والاطعمة بالداخل. طبعا التقسيمات دى بتختلف من نوع للاخر.

ضبط درجة حرارة الميكرويف

حابة بس اوضح انك لو ضبطتى الميكرويف على درجة حرارة معينة ووقت معين وليكن دقيقتين وحسيتى انهم كتير عادى جدا لما توقفي التشغيل وتفتحى الميكرويف مش هيحصل حاجة خالص عادى جدا مش لازم تستنى لما الوقت ينتهى تمام كدة واقل وقت تبدئي بية 30 ثانيه

الآوانى الممنوع وضعها فى الميكرويف

ممكن ناس كتير تستغرب من اللى بقوله فى الادوات اللى ممكن تدخل الميكرويف بس دة مش كلامى دة كتالوج الشركة بيقول كده.

  • ممنوع منعا باتا استخدام الاشياء التى تحتوى على الذهب او السيلفر أو المعادن يعنى ممنوع منعا باتا استخدام ورق الفويل القصدير ولا اطباق القصدير استعمال المرة واحدة ابدا.
  • وكذلك ممنوع استخدام الاطباق او الاكواب الزجاج اللي عليها رسومات او خط بالذهبي او الفضي دول اخطر حاجة وممنوعين نهائي.
  • وايضا ممنوع منعا باتاً ترك معلقة او شوكة معدن فى الاطمعة واحنا بنسخنها.
  • بعض الاطباق حتى لو زجاج شفاف بس بتكون لا تدخل الميكرويف ودة بنعرفة من اننا لو لاقينا علامة الميكرويف اللى هى شكل الميكرويف نفسة مرسوم يبقي دة بيدخل الميكروييف ولو مش مرسوم يبقي مش بيدخل.
  • ممنوع منعاً باتاً وضع الحلل أو الطاسات أو أوانى الطهى داخل الميكرويف.

الآوانى المسموح بوضعها فى الميكرويف

  • مسموح استعمال الاطباق الفلين او الصيني بدون رسومات ذهبي ولا فضي.
  • ومسموح بالاكواب الزجاج وكمان ممكن استعمال نايلون التغليف يعنى الاطعمة المغطاة بالنايلون تتدخل الميكرويف عادى.
  • وايضا العلب البلاستيك الخاصة بالميكرويف والزجاج الخاص بالميكرويف والصيني ونخلي بالنا فى بعض الاطباق حتى لو زجاج شفاف بس بتكون لا تدخل الميكرويف ودة بنعرفة من اننا لو لاقينا علامة الميكرويف اللى هى شكل الميكرويف نفسة مرسوم يبقي دة بيدخل وهكذا والعكس صحيح.

هل الميكرويف صحي وآمن؟ وما هى مميزاته؟

هبدأ بأهم ميزة للميكرويف وهي اختصار الوقت والتسخين الممتاز. طبعا بالرغم من كل الادوات اللى ممكن نستعملها فى الميكرويف لكن لو هنيجى للصحي والامن اننا نستخدم الزجاج فقط سواء علب او اطباق او اكواب تكون كلها زجاج. ودة لتقليل مخاطر استخدام الميكرويف لان البلاستيكات بتتفاعل مع الموجات الصادرة من الميكرويف ودة فى حد ذاتة ممكن يسبب الامراض عافنا الله.

طريقة تنظيف الميكرويف

لتنظيف الميكرويف نحضر طبق عميق او بولة ونضع فيها عصير ليمون وخل وماء ونضعها بداخل الميكرويف ونشغلة لغاية ما تغلى المياه دى ونتركها تغلى شوية وبعدين نطلع البولة من الميكرويف ونكتفى بالبخار الناتج من غليان المياه بالخل والليمون بفوطة نظيفة مباشرة ننمسح الميكروييف من الداخل كويس ونغسل الطبق الرئيسي بتاعه عادى على الحوض بالماء وسائل التنظيف.

دة كان موجز مبسط لاستخدام الميكرويف واضرارة وفوائدة يارب اكون قدرت افيدكم بمعلوماتى البسيطة لا تنسونى بصالح دعائكم مع تحيــاتى (منى جـاد) منوس ننوس.

التعليقات

إترك تعليقاً