التخطي إلى المحتوى
المهندس العبقري ديتر رامس
المهندس العبقري ديتر رامس

تعالوا نتكلم عن مهندس، ايوا انتوا قريتوا صح مهندس، اتكلمنا قبل كدة عن فلاسفة وادباء وفنانين واقتصاديين وسياسيين، جه الدور اننا نتكلم عن حد من فصيل هوا الاهم في بناء الحضارة الإنسانية والاقل تسلطا للاضواء من قبل العامة والمثقفين علي سواء، المهندسين.

المهندس العبقري اللي هنتكلم عنه هوا احد المع واهم عقليات القرن العشرين، ديتر رامس.

شركته اللي انضملها وهيا شركة راديوهات محلية صغيرة في المانيا هتصبح علي ايده عملاق عالمي منتجاته موجودة في كل بيت اللي هيا شركة “براون”

رامس كان ممكن بحرفيته العالية يبقي نحات او فنان عالمي الا انه اختار تصميم الالات الالكترونية زي الراديوهات والالات الحاسبة والخلاطات واشياء اخرى كتير، اختار عالم الظل علي عالم الاضواء والنجومية لسبب انه كان همه فايدة البشرية.

في دروس مهمة ممكن نتعلمها في حياتنا من هذا العبقري وفكره وتصميماته اهمها:

١- اهمية البساطة:

رامس لم يكن من محبي البهرجة في تصميم آلاته وكان بيصر انها تبقي ابسط ما يمكن وانها تكون وظيفية من الدرجة الأولى، وبيبان ده في تصميمه لاحد اوائل راديوهاته اللي صممه بزر واحد للتحويل والتشغيل، في حين ان الاخرين بيدوروا انهم يصمموا راديو بساعة ومؤشرات واسلاك وزراير كتير، هوا صمم منتجه ببساطة شديدة ولاقي نجاح كبير، وكان بيشوف ان البساطة دليل علي الثقة والاتزان النفسي.

٢- اهمية التواضع الشخصي والوضوح والسهولة في التصميم:

رامس كان عارف ان مهنته مش مدرة للشهرة بشكل كبير الا انه اختار ده بشكل واعي جدا وشاف ده شئ جيد وطبقه في منتجاته وفلسفته التصميمية،لان المستهلك في النهاية بيشوف المنتج النهائي ومبيهموش مدي المجهود اللي اتوضع في تصميمه وصناعته.

شئ تاني كان مهم بالنسباله هوا سهولة تشغيل تصاميمه من قبل المستهلكين وانه كان بيقيس مدي النجاح في تصميماته بمدي استغناء الناس عن دليل الارشاد لفهمها، رامس كان عنده فهم عميق لسيكولوجية المستهلك والناس بشكل عام لانه عارف اننا مش بالذكاء والهدوء اللي بندعيهم، وده شئ طبيعي اننا نكون علي قدر من الغباء عشان كدة بحس ابوي عطوف وليس تحقيري من المستهلكين كان بيصمم الاشياء بوضوح وسهولة.

٣- كن تقليدي:

رامس كمصمم ومهندس مكنش عنده هوس بالتجديد. بالعكس كان احد اهم معاييره للمنتج والالة الجيدة هوا قدرتها علي البقاء بكفاءة اطول فترة ممكنة، وكان بيشوف ده ميزة وليس عيب وكان بيدعي انه لازم الفكر ده يبق علي كل شئ خصوصا الاقتصاد، وضرب مثال بالكتب اللي بعضها بيبقي قديم لمئات السنين اللي انه بيظل واسع الانتشار لسبب بسيط انه فعال وناجح في تغيير الفكر للافضل.

٤- علاقة الفن بالتصميم:

رامس بينتمي لمدرسة فيرمير الفنية اللي بتعلي من شان كل ما هوا بسيط وعادي وبتشوفه مصدر للجمال، الا انه اختار التصميم لانه من خلاله يقدر يوصل ويلهم الناس ويفيدهم في حياتهم اليومية عكس الفن اللي بيبقي زيارة سنوية او اقل للمتاحف.

كبشر طامحين للنجاح لازم نتعلم من هذا العملاق الهندسي، وكمواطنين في هذا العالم وفي هذه الاوقات احنا مدينين لهذا الرجل بالكتير.

التعليقات