التخطي إلى المحتوى
أقدم أكلة مصرية بالتقلية
أقدم أكلة مصرية بالتقلية

لما تسافر للسويس وبورسعيد أو كفر الشيخ هيقدموهالك بالجمبرى ..

 

ولو سافرت لسوهاج وقنا أو الأقصر هتدوق طعمها المميز مع عصير الليمون والشطه الحمرا ..

 

ولما تروح النوبة وأسوان وإسنا هتلاقيها موجودة طول السنة ناشفة ومتخزنة فى برطمان جوه النملية ..

 

وفى ناس بتعملها باللحمة وناس بالفراخ وأوقات شوربة , ثقافات متنوعة , لكن كل الناس بيحبوها بالأرانب.

 

بيقولو عليها بالصعيدى ( شلولو ) وبالنوبى ( إيتر ).

 

انها الملوخية يا سادة , أكلة مصرية 100%.

 

أقدم من الكشرى والفول والمسقعة , مصر كلها تعرف طعم الملوخية أكلة مقدسة فى جميع انحاء أم الدنيا مصر من الجنوب إلى الشمال فى الشرق والغرب فى المدن فى القرى والأرياف فى الصحراء فى السواحل غنى فقير أكلة لكل المصريين , ودايمآ الملوخية هى الإختيار الأول فى أى عزومة ومختلف المناسبات..

 

لو دخلت أى بيت مصرى لازم ولابد وحتمآ تلاقى (مخرطة الملوخية) سكينة نصف دائرية حادة جدآ بتستخدم فقط فى تقطيع أو خرط أوراق الملوخية ومع إنها بتستخدم للملوخية فقط , لكن البنت المصرية وهى بتستعد للزواج وبتشترى جهاز بيتها عمرها ما نسيت تشترى المخرطة وده يبين لك قد أيه البيت المصرى عاشق للملوخية.

 

مايه وملح وثوم وزيت مع أوراق الملوخية هى دى المكونات الأساسية ومع ذلك مش أى حد تستطعم من إيده الملوخية ويخليك تقول مع أول لقمه (الله نفسك حلو) طبق الملوخية فعلآ أكبر مقياس على النًفس الحلو , مع إن مكوناتها بسيطة لكن طعمها المميز مش اى حد بيقدر يوصله , بتحتاج فترة طويلة علشان تقدر تطبخ الملوخية وتطلع معاك بالطعم المظبوط وعلشان كده لما تحب تأكل الملوخية كلها من إيد الناس الكبيرة فى السن بيبقى ليهم تجارب وخبرة طويلة مع طبق الملوخية.

 

وسواء الملوخية كانت بالجمبرى أو بالفراخ أو باللحمه أو بالأرانب أو حتى ناشفه بتفضل نكهة ومذاق وريحة الملوخية القوية هى الغالبة.

 

الملوخية بتتزرع فى مصر من قديم الزمان ومصر تعتبر موطنها الأصلى , وطبعآ اللى قابل للأكل من نبات الملوخية هى الأوراق بس, والملوخية مع طعمها الجمبل الممتع كمان غنية بعناصر غذائية كتيرة اللى بيستفيد منها أجزاء وأعضاء متعددة فى جسمنا منها , فيتامين A ,C ,E ,B1 ,B2 وبعض من الأملاح المعدنية زى الحديد و الفسفور والكالسيوم والمنجنيز ده غير المادة المخاطية اللزجه اللى ثبت علميآ إجابيتها على المعدة وعملية الهضم وأجزاء من الألياف وكمان بتحتوى على أجزاء من البروتين ومادة بيتا كاروتين , بمعنى أصح طبق الملوخية وجبة صحية بكل المقايس للمعدة والجلد والنظر والكولسترول وحاجات تانية كتير.

 

التعليقات