التخطي إلى المحتوى
الفلسفة الشرقية كين تسوجي
الفلسفة الشرقية كين تسوجي

مع تفتح وعينا بينمو جوانا امآل كبيرة عن شكل حياتنا في المستقبل، بنحلم بعلاقة عاطفية مثالية واسرة سعيدة ومكانة مالية واجتماعية مرموقة، الا ان الحياة عندها هواية دائمة في كسر الامال دي علي صخور الواقع.

احد اعظم المبادئ اللي بتعلمنا احترام معاناتنا ومعاناة الاخرين في الحياة هو مبدأ مستمد من بوذية الزن، وهو عبارة عن احترام الاواني المكسورة وعدم اهمالها، بالعكس الاعتناء بيها ولحمها بالذهب كتعبير عن احترام الالم والاضرار وان عملية اللحام دي كناية عن لملمة انفسنا من ضربات الدنيا وقسماتها.

المصطلح اللي بتسمي بيه العملية دي هوا “كين تسوجي” واللي بتعني باليابانية اللحام بالذهب.

ببساطة لان ده اللي بيتم، الانية المكسورة بيتم جمعها بعناية فائقة ولحمها بالذهب، واختيار الذهب لاظهار اللحام وعدم اخفائه بل اظهار الاصلاح اللي بيتم له دلالة فلسفية كبيرة عن قيمة الالم والانكسار كمعلمين عظيمين للبشر.

فن الكين تسوجي بيعود لاحد اباطرة اليابان لما كسر كوبه المفضل وارسله للصين لإصلاحه ولكنه اتفاجئ بقبح عملية اللحام، عشان كدة اوعز لرجاله اصلاحه بشكل افضل، ومن هنا قاموا باصلاحه ولحامه بحيث ميخفوش الكسور ولكن اخراج المنتج النهائي بشكل فائق الجمال زي ما باين في الصور.

الكين تسوجي دخلت الفلسفة البوذية عن طريق الفيلسوف روكيو بحسب القصة اللي قالت انه كان معزوم في ضيافة حرفي حس انه هيبهر باحد الانية اللي صممها بدقة وجمالية فائقة، لكنه صعق انه روكيو ما اعارهاش اي انتباه، وتحت ضغط الاحباط كسرها لكن احد الحكماء لملم الاجزاء ولحمها بالذهب، وفي زيارة اخري لما شافها روكيو قال “الان اصبحت رائعة”.

في عالم بيعلي من شأن كل ما هوا جديد وكامل، فلسفة الكين تسوجي بتفكرنا اننا نبقي عطوفين ومحبين لانفسنا وللاخرين في حالة انكسارنا تحت ضغوط الحياة واننا لازم دايما نلملم شتات انفسنا وننهض من جديد.

التعليقات

نحن هنا من اجلك لا تتردد في ترك رد لمساعدتك