التخطي إلى المحتوى
سينابون بصوص الكراميل والشيكولاته وصوص الكيري
سينابون

اليوم سأشرح لكم طريقة عمل سينابون بصوص الكراميل والشيكولاته وصوص الكيري بالخطوات والتفصيل

مقادير السينابون

نص كيلو دقيق + بيضة كبيرة او بيضتين بلدى + ملعقتين كبار زبدة + نص ملعقة كبيرة خميرة فورية نوع كويس (انا استخدمت التركى ممتازة) + تمن كوباية سكر بودرة + مج لبن دافي او حسب ما تاخد منك العجينة، وممكن استبداله بملعقتين لبن بودر ومج مية دافية + ذرة ملح

طريقة عمل سينابون

نحط المواد الجافة مع بعض (الدقيق والخميرة واللبن البودرة وذرة الملح)

ونقلب كويس ونضيف الزبدة او سمنة نوعها كويس والبيضة ونقلب

وانزل بالمية الدافية براحة واعجنها كويس جدا لمدة لا تقل عن خمس دقايق

واحطها فى علبة محكمة لتخمر ودى نقطة مهمة وفرقت معايا كتير

كنت بحط العجين فى بولة واغطيها واحطها فمكان دافي

اما استخدمت علبة محكمة الغلق وعليها كيس بلاستيك فرقت معايا كتير جدا فالتخمير بسرعة وبشكل كويس جدا

واسيبها ساعه هتخرجيها على الرخامة بعد رشها بدقيق خفيف وتفردى العجينة بالنشابة وتكونى محضرة الاتى

كوب سكر بنى او البديل (كوب سكر علية معلقتين عسل اسود وتقلبية كويس جدا)

وعليه ملعقة كبيرة قرفة وملعقة صغيرة كاكاو خام

هندهن العجينة كلها بزبدة بدرجة حرارة الغرفة مش سايحة

وتحطى السكر البنى المضاف اليه القرفة والكاكاو وتفردية كويس جدا ماعدا الاطراف

وتلفيه زى السويسرول بالظبط وهتجيبي سكينة مشرشرة وبراحة جدا هتحطى 3 صوابع عشان يكون بمقاس واحد

وتقطعية براحة جدا متضغطيش على السكينة ودى نقطة مهمة وترصية فصاج

وهتسيبي مسافات كبيرة لاننا هنغطية تانى ونسيبة يخمر مرة تانية نص ساعة كمان

وتدخليه درجة حرارة 170 فى الرف الاوسط فى الفرن لغاية ما يستوى

وتحضري الصوص انا عملت صوص شيوكلاتة وكراميل وكيرى كالاتى

صوص الشيكولاته

معلقة صغيرة زبدة على النار تضيفي لها ملعقة ونص كبار كاكاو خام وملعقة ونص سكر بودرة وتقلبي بسرعة

وتنزلى باللبن سرسوب براحة لغاية القوام واللون اللى تحبيه

الصوص دة اكتر من روعة وممكن استخدامه فحاجات تانية كتير وهتجربوه وتدعولى ان شاء الله

صوص الكراميل

كوب سكر ناعم جدا شرط فى كاسرولة على النار وتكون النار هادية

وتسبيه متحركهوش انا مش بضيف مياه نهائي وتسبيه هيسيح وحركى براحة الكاسرولة لغاية ما كلة يسيح

هتنزلى براحة جدا وخدى بالك من وشك بكوباية لبن كامل الدسم وعليه ملعقة قشطة

فى طرق بيتعمل بقشطة او كريمة لبانى بس بيكون تقيل جدا انا عملت دة وجميل جدا

وفى الاخر ضيفي ربع ملعقة زبدة للمعان واطفي النار

اما يستوى السبنابون هتسبيه يهدى شوية وهتنزلى عليه بالصوصات دى

والافضل ياخد رشة عين جمل طبعا بس مكنش متوفر عندى

وبألف هنا اتمنى تجربوه وينال اعجابكم

ملاحظات
recipe image
وصفة:
سينابون بصوص الكراميل والشيكولاته وصوص الكيري
الشيف:
نشر فى:

التعليقات

إترك تعليقاً