هناك العديد من الناس يقعوا تحت سطوة الديون والافلاس والكثير منهم يسأل نفسه كيفية التخلص من الديون .. في هذا المقال سأشرح لكم خطوات عملية للتخلص من الديون.
اسباب الديون
يجب في البداية معرفة ايه الأسباب اللي خلت ديونك تزيد عليك.. إنك تعرف الأسباب اللي وصلتك لكده مهم جداً عشان تعرف المشكلة من أصلها.
مثال: لو طلعت رحلة صرفت فيها 5 آلاف جنيه عشان منال بنت عمة بابا عرضت علينا نطلع معاها واتحرجنا نقولها لأ!!.
إذاً أصل المشكلة سلوكية: انت عندك مشكلة إنك مبتعرفش تقول لأ في الوقت المناسب وبتتحرج!!.
النفقات الشهرية
اعمل خطة لنفقاتك الشهرية الثابتة واكتب فيها كل الإلتزامات.. وإلتزم بالخطة دي واتخلص من كل نفقات الرفاهية اللي بتصرفها بدون ما تاخد بالك وبتزود مصروفك واستبدلها ببدائل أخرى أقل إن كانت ضرورية.
مثال: كل يوم بتأكل ساندويتشات خارج البيت.. وليكن مثلاً بـ 25 جنيه ودول يعملوا معاك في الشهر مبلغ إجمالي كذا لو اتعودت تأكل في البيت هتوفر ما لا يقل عن 50% من حجم المصروف ده.. متقولش دي حاجة بسيطة لأن الحاجات البسيطة الصغيرة دي بدون ما تاخد بالك بتتحول لجبل مُخيف.
شراء المنتجات
اتعلم ازاي تشتري احتياجاتك صح وابعد عن المنتجات الإستهلاكية الرديئة اللي بتخسرك وبتصرف عليها كل شوية.
مثال: بتشتري كابل شحن لجهازك بـ 20 جنيه وكل شوية الكابل يبوظ وتجيب غيره.. فبدون ما تاخد بالك انت قاعد تخسر وانت فاكر انك بتوفر.. الصح إنك تشتري كابل جودة عالية عشان مش كل شوية تصرف على نفس الإحتياج ده وقيس على ذلك كل احتياجاتك الأساسية.
مصدر الدخل
زود مصادر دخلك فلو كنت في وظيفة صباحية دور على وظيفة مسائية.. أو اتعلم مهارة اونلاين تقدر تشتغلها من بيتك ولو كنت تعمل في مجال البيع طور نفسك في مهارات البيع والإقناع.. واتعلم ازاي تكبر مبيعاتك عشان يكون عندك أكبر قدر ممكن من الفائض.
القروض
احذر جدا جدا من أن تعالج الديون بالديون.. أو القروض بالقروض.. فهذا يُزيد من حجم المشكلة.
المحيط الغير مناسب
ابتعد تماما عن المُحيط الذي تشعر فيه بأنك مُجبر على الصرف لمواكبته.. لا تجبر نفسك على مصروف فوق طاقتك فقط كي تحافظ على مظهرك الشخصي!.
التسديد و التخلص من الديون
لو نفذت كل النقاط السابقة صح ووفرت من دخلك.. فمن فائض ميزانيتك الشهرية ركز على دين محدد تسدده.. ده هيخليك تشعر إنك بتحقق إنجاز في السداد أفضل من إنك توزع كل الفائض على كل الديون.
مثلاً: عندك فائض بمبلغ كذا شهرياً وعندك 3 جهات ديون. فحدد 70% للدين الأكبر.. و20% للدين الوسط.. و10% للدين الأقل.
أعلم أن الأمر ليس سهلاً.. لكن صدقني لا توجد حلول سحرية لحل المشاكل فالوقت جزء من الحل وبذلك نكون اجبنا عن تساؤل كيفية التخلص من الديون .. وسدد الله عن كل من نوى السداد بصدق.