ما زال هناك الكثير من الافراد بتجادل التجار بالنسبة للبيع بالاسعار، هل يكون البيع على السعر القديم ام بالسعر الجديد بعد زيادة الاسعار على التجار ومازال مع التاجر بضاعة او منتجات في مخزنه ارتفع سعرها؟
وهنبدأ بالشرح التبسيطي لمجموعة من الافكار ليتثني للجميع ان يعرف الاجابة على هذا السؤال.
هل البيع على السعر القديم ام الجديد ؟
خلينا نبدأ بالأرقام لو تاجر عنده سلعة ما تكلفتها 100 جنيه وبيقوم بيبعها بسعر 120 جنيه وده معناه ان مكسبه هو 20 جنيه.. لكن سعر السلعه تكلفته زاد وبقى التاجر هيجيب نفس السلعة بسعر 130 جنيه وهتتباع بسعر 150ج يعني مكسبه ثابت اللى هو 20 جنيه.. في الحالة دي ايه اللى هيحصل؟!
لو التاجر باع السلعة الموجودة عنده للزبون بالسعر القديم اللى هو 120ج وراح اشتراها بسعر 130 جنيه يبقي التاجر هنا دفع من جيبه الخاص 10 جنيه عشان يجيب نفس السلعة اللى سعرها زاد وكمان خسر مكسبه اللى هو 20 جنيه.
وده بيكون خسارة كبيرة للتاجر لما سعر السلعة يزيد.. لان القوة الشرائية لمبلغ 100 جنيه قلت.. وبالتالي رأس المال يقاس القوة الشرائية له وليس بعدد الاموال.
مثال اخر طيب لو حصل لا قدر الله ظرف اقتصادي كارثي، أدى لانهيار العملة بالمعنى الحرفي للكلمة، وأصبح كيلو الجبنة مثلا من تاجر الجملة يساوي 20 ألف جنيه مصري، هل يقدر البقال او السوبر ماركت أنه يبيع لك مخزون الجبنة عنده اللي كان اشتراه بسعر الكيلو 100 جنيه، مطلوب أنه يزود هامش ربح 20 جنيه ويبيعها بسعر 120 جنيه، فهل لما تخلص هيقدر تاجر القطاعي انه يروح يجيب من تاجر الجملة الجبنة بسعر 20 ألف جنيه في الكيلو؟ ولا لازم يزود السعر على البضاعة الموجودة عنده؟؟.
هل العميل سيتقبل الشراء بالسعر الجديد؟
عملاء كتير برده بيعترضوا على زيادة التاجر لسعر سلعة موجودة عنده في المخزن اشتراها على السعر القديم وعايز يبعها على السعر الجديد.. هشرح للعملاء امثلة يجاوبوا عايزهم عليها وهيتأكدوا من خلالها ان البيع للبضاعة الموجودة عند التجار بالسعر القديم لازم يكون على السعر الجديد.
تغير سعر الذهب الموجود مع العميل
هل لو العميل كان عنده 50 جرام ذهب وشاري الذهب من زمان بسعر 100 جنيه للجرام ودلوقتي الذهب رفع سعره الى 700 جنيه مثلا .. فهل العميل المعترض على زيادة السعر وبيقول ان السلعة اللى على السعر القديم تتباع بالسعر القديم.. هل العميل ده هيبيع الذهب على السعر القديم أم على السعر الجديد؟؟
تغيير اسعار السيارات وتصرف العملاء
مثال اخر لو انت اشتريت عربية، تمنها جديدة في 2010 مثلا 70 ألف جنيه، وبعد سنين استعمال ليها وفي 2022 كانت الجديدة منها تساوي 400 ألف جنيه، والمستعملة تمنها 160 ألف جنيه، هل هتبيع على السعر اللي اشتريت بيه ولا على سعر السوق؟.
شركات العقارات البيع على السعر القديم ام الجديد
شركة اشترت عقارات بغرض بيعها، كان تمنها في سنة 2015 يساوي 100 الف جنيه لكل عقار، وبعد سبع سنوات من الظروف الاقتصادية والتغير في قيمة العملة، أصبح قيمة المخزون العقاري بعد إعادة التقييم يساوي 500 الف جنيه للعقار الواحد.. ما يعنيه أنه مش هيقدر يعوض نفس عدد الوحدات إلا لو باع بالسعر الجديد.. بماذا تنصح الشركة؟
تأثير البيع على السعر القديم ام الجديد مع تغيير الدولار
شركة تستورد الدواء من الخارج، بسعر 7 دولار للعلبة وسعر الدولار يوازي 10 جنيه مصري.. يصبح الدواء ذو 7 دولار يساوي 70 جنيه مصري.. تم تعديل سعر تغيير العملة واصبح سعر الدولار 15 جنيه مصري.. لتصبح قيمة نفس العلبة ذات 7 دولار تساوي 150 جنيه مصري.. فإذا باعت الشركة المخزون بالسعر القديم لن تستطيع توفير ثمن الطلبية الجديدة وسيتوقف الدواء عن الوصول للسوق المصري.. كيف تنصح الشركة بتحديد سعر البيع؟
الزيادة في سعر السلعة اذا ارتفع سعرها في السوق
مقدم خدمة، قام بتسعير خدماته المختلفة بناء على متوسط ما يحتاجه للاعاشة.. وليكن بسعر 10 كيلو جبنة كمتوسط دخل يومي.. ولكن تم ارتفاع أسعار الجبنة كما ذكرت بأول المقال.. هل تنصحه بزيادة أسعار خدماته؟ أم يكتفي بما يعادل 5 كيلو جبنة؟.
الرأس مالية والبركة ليسوا ضدان ولكنهما ليسوا مترادفان.. ألعب بالاسعار زي ما تحب، لكن البركة فقط من الله.. إنما التفكير الرأس مالي السليم بيقول ان البيع دايما بالسعر الجديد.. مش علشان المكسب يزيد، لكن علشان الحفاظ على رأس المال أو المخزون.. يعني تدوير البضاعة، ودي برضه قصة ملهاش دعوة بالبركة!.
فقيمة رأس المال الموجود في المنتجات يعتمد اعتماد كلي على قيمة القوة الشرائية لعملة بلدك وليس بعدد الاموال.