ليه الحب "love" كلمة فارغة، وهل فيه هناك بديل أفضل ؟!؟!
مفهوم الحب
الحب بمفهومه الشائع هوا القيمة العظمي لحياتنا والشئ الأهم اللي بيخلينا نصنف علي اننا “بشر”، إلا انه في الوقت نفسه مصدر طاغي للقلق والأرق، ببساطة لأننا في داخلنا في أوقات كتير مبنحسش بيه او مش بنمارسه بالطريقة الطبيعية المتعارف عليها طبقا للأدبيات الرومانتيكية اللي بتعتبر المرجع في فهمنا للحب.
المجتمع بيحدد مواصفات محددة جدا ل “الشخص الطبيعي” فيما يتعلق بمفهوم الحب، وهوا اننا لازم نكون علي علاقة جنسية بمن نحب دايما، والأهم اننا دايما نكون بنشعر برغبة جامحة وشرارة مستعرة بينا وبينهم، مثلا لازم نبقي مشتاقين ليهم باستمرار في غيابهم ومتطلعين اننا نترمي بين احضانهم، باختصار يجب زي ما قولنا اتباع “الأجندة الرومانتيكية” القياسية بشكل حصري كما نص عليها فكر القرن ال 19، كلام جميل جدا نظريا، إلا انه ابعد ما يكون عن الحقيقة واقعيا.
قدماء الاغريق والحب
لو ده تعريفنا ل “الحب” وان الشخص الطبيعي لازم يحب بالشكل ده فيجب اننا نعترف بكامل الإحساس بالإحباط اننا منعرفش شئ عن الحب !!!! وهنا بقي بتظهر اهمية “قدماء الإغريق”.
الإغريق ايقنوا في وقت مبكر ان في اكتر من شكل ل “الحب” مش شئ واحد واننا لازم كمجتمع نتبني ونعتنق كل الأشكال دي ونوليها احترامنا، وفرقوا بين 3 أشكال من الحب واعطوا كل شكل منهم كلمة مختلفة رائعة.
اول الأشكال دي هوا ما اسموه بال Eros، وهي مرحلة الانجذاب الجسماني الشديد والجامح بين الشخصين في بداية العلاقة، الا انهم ادركوا ان الحب بيكمل بين الشخصين حتي لما حدة مرحلة ال Eros بتهدا، وده يقودنا مباشرة للشكل التاني من الحب عند الاغريق.
الشكل التاني ده هوا ما اطلقوا عليه ال Philia، واللي اقرب ترجمة ليها friendship او صداقة، الا ان الكلمة اليونانية القديمة اكتر دفء وصدق، ودي المرحلة من العلاقة اللي أرسطو كان بيشوف انها مرحلة النمو والنضوج واللي غالبا بنبني علي فلسفتها علاقاتنا طويلة الأمد، ببساطة لأنها مش مجرد انجذاب لحظي ولكنها دفء وامان وشراكة حياتية كاملة، اهمية الشكل ده من الحب انه بيمد في أجل مفهوم الحب نفسه حتي لما بتفشل كلمتنا المعتادة love عن الوصف.
الإغريق كان عندهم شكل تالت من الحب وهوا ما اطلقوا عليه Agape، وده اقرب ترجمة له هوا “العطف”، شئ يشبه ما يشعر به الآلهة تجاه البشر، وهوا حب عطوف بغض النظر عن كوننا مليانين عيوب، شكل من الحب موجه لنقاط ضعف الأشخاص مش نقاط قوتهم، مفهوم بيفكرنا ان الحب مش مجرد انجذاب لما يملكه الأشخاص من مزايا ولكن أيضا تفهم لعيوبهم والأهم ادراك اننا احنا نفسنا مليانين عيوب زيهم ومينفعش نبقي judgmental طول الوقت.
اعتناق ال3 كلمات دول “EROS, PHILIA, AGAPE” بدل من الكلمة المعتادة “LOVE” بيوسع مداركنا ومفهومنا عن الحب ومش بيحصروا في منطقة صغيرة، وده بيورينا قد ايه قدماء الإغريق كانوا حكماء، عن طريقهم ادركنا مدي شمول الحب في حياتنا.