بعض الناس بتعتقد ان الطبيعة ما هيا الا اعصار كبير بياخد كومة من الاتربة ويحولها بشكل اعجازي لقصر كبير، لكن الطبيعة مش كدة علي الاطلاق خصوصا فيما يتعلق بعملية انتاج الكائنات الحية عن طريق التطور بالانتخاب الطبيعي.
عملية التطور هل هي عشوائية
اللي بيحصل ان اثناء نسخ المادة الوراثية DNA بيحصل تغيرات طفيفة جدا عن طريق التطفر وعن طريق اعادة ترتيب وخلط القواعد الوراثية وعن طريق الحذف والاحلال، كل العمليات دي عشوائية فعلا، لكن خطوة “الانتخاب الطبيعي” ابعد ما تكون عن العشوائية..
الكائنات بتبني نفسها باستخدام شفرات ال DNA الوراثية، واثناء نسخ الشفرات دي بيحصل زي ما قولنا تغيرات عشوائية طفيفة، لكن اللي بيحصل ان اثناء عملية البناء نفسه طبقا للشفرات دي بعض الابنية بتقع وتتهد، وبعضها بيكمل تواجد بشكل طبيعي، وبعضها بينتج عنه بناء افضل حتي من النسخة اللي الشفرة منقولة عنها، وهنا بيجي دور الانتخاب..
استثناء الابنية السيئة الغير قادرة علي التوائم مع البيئة واختيار وانتخاب شفرات الابنية الجيدة القادرة علي الاستمرار للتواجد واعادة الانتاج، وتستمر العملية دي علي مدي حقب طويلة..
تغيرات عشوائية طفيفة في الشفرة الوراثية، وانتخاب ما يصلح منها للبقاء واستثناء واستبعاد الغير صالح منها، وعلي المدي البعيد بينتج كائنات جديدة من تراكم التغيرات وانتخابها واستثناء اخري.
طب ليه في تنوع هائل في الكائنات وانواعها، ببساطة لان الطبيعة ما اختارتش تعمل بناء واحد وشفرة نسخ واحدة يتسموا بالكمال، ولكن انتجت بلايين الابنية وتريليونات الشفرات، وعملية الانتخاب للاصلح هيا اللي بتقرر ايه اللي هيبقي وايه اللي هينقرض ويختفي.
زي ما شفنا بقي محدش يرجع يقول التطور عملية عشوائية، لانه في الواقع ابعد ما يكون عن كدة.